 Le lévre é la tortue
Source : Bernancio ! limérot 86 (La Fontaine) ; rimajhure a Marie-Anne May,texte d'Eugène Charier,Poésies, Fontenay-le Comte,Lussaud,1929.
A la muntàie de la lande poéntue,
In lévre qu’étét assé grous,
Venét de pariàe avec ine tortue
Toute ine peneràie de becotes de chous
Que dépis le tét a goréts daus Forjhes,
Jhusqu’a la clla dau chanp dau Quart,
Maeme en partant deùs eùres pu tard,
Le gagnerét su lai ine eùre de relojhe.
Vela dun la tortue qui s’en vat,
Sen prendre le tenp de cassàe la croute ;
Un arét dit in grous luma
Qui se trénnét sur le mitan de la route.
Quant a voeyét in cocrea d’eàu,
A fasét in détour a dréte.
Lés draules lli foutiant daus coups de bots,
Pi lli garochiant daus poeres « blettes ».
Netre lévre en riét den sun jhabot :
« Avant qu’a yi séjhe arivàie,
I ae bé le tenp de faere la merionàie,
Sunjhét ell, mé, auparavant,
I m’en va alàe den le frment
Menjhàe de la nouàie é de la cérnure. »
Pi le vela qui quemence a trotàe
Den lés raeses é den lés foussais.
Enfin, quant le sit bé faticai,
Le s’ét endormi den ine frmure.
É ll’arét dormi cunbé de tenp,
Si le grous chén nér de la Podevinére,
En s’en alant menàe lés bàetes boere,
Avét fét moén de brit en jhapant.
Dés en s’évellant le vela qui se grate,
Pi se frote lés élls avéc sa pate ;
Ll’étét sement pa revenu a lli
Que la souvenence lli vént de çhau pari.
Sen prendre le tenp de regardàe l’eùre,
Le vela qui file a toute alure,
Cope a travér le Grand Pati,
Travrse le charàu dau Sordi,
Pi, pr étre moén jhénnai, sen doute,
S’en vat viràe su la grand route ;
I sé bé sur que dau traén que ll’alét,
Jhamae lés chéns l’ariant sivai.
Un arét dit a sen arivàie
Que le sortét dau mitan d’in douét,
Télement que sa pea étét moullàie.
« Enfin, fit la tortue, ve vela !
Ol at pu d’ine eùre qu’i sé la.
I cryàe que ve z-étiéz malade ;
Dame, i venàe de menjhàe ine salade,
Regardéz lés éssélles. Pr en finir,
Ve voeyéz qu’o sért a rén de courir.
Ine àutre foes, ve prendréz vos mesures :
O fàut hobàe quant ol ét l’eùre. » |
