3. Grigoere en petrasse contre in manjhour

In de çhés rouinours, dunt te véns de parlàe, Vénghit, in de çhés jhours, sen se faere priàe, Den le petit carai dau foussai de la Mote, Prenre de part le Ràe çhéle vache Calote Que ll’achetit entour dau cabanàe Jhorjhét. I ne sé déjha pu ce qu’ol ét qu’a coutét. Ni pu ni moén, la vache étét é béle é boune. O ne fàut dunque poén, Denis, que te t’étounes Si Grigoere fasit de sés pais, de sés méns Pr enpaechàe de manjhàe sun pauvre gagne-pén : Le sérjhent fut batu, sa ruque fut pégnàie ; Ll’avét en mile endréts sa face égrafignàie ; Mé le fut le pu fort, aedai de sun recors Qui, sésissant d’abord la vache pr lés cors, Li fésit in licou d’ine de sés jhartéres. O dame ! o fut içhi que Grigoere en colére Dissit au grafinour, li dounant mile nums : « Va, va, t’és pu chéti cent foes que lés démuns, Voleùr de pauvres jhents, daus oumes le pu mablle. I ae dounai mile foes ma vache a touts lés diablles, I lés fasàe trenbllàe, tant fort i renacàe : Jhamae, pr l’enlevàe, gn’ant fét le moéndre pas. Mé, tàe, chéti coçhin, te n’as jha fét de maeme : Sen étre demandai, pr boutràe cunbae t’aemes A rouinàe lés jhents, te véns pr l’enmenàe. Va, bélitre ! vaurén ! te dés remérciàe Que t’és pu fort que màe, car sen çheù ta carcasse Sérvirét den lés chanps a chaçàe lés ajhaces. I hacheràe ta chaer en si petits morceas Que le pu grous téndrét en le bec d’in osea !