1. Pérot quiarche tun chalumea (version courante de 1742)

Pérot, quiarche tun chalumea, Pllante m’içhi touts tés agnas, É t’en ven oque nous. Vén voer çheùque chouse de bea Que jh’alun voer trtouts. In anjhe avéque daus plluméts Vént de m’avrti qu’a minét, Ol ét nai ché Colas Su de la palle, den sun tét, Daus enfants le pu bea. Alun trchàe çhau dous poupun : Lle mérite bae qu’i courjhun, Car ll’ét, ce disant all, Le ràe daus cieùs que jh’atendun É dau bun Dieù le fall. Séchun rendus tout daus prmàes, Pr le besàe, pr l’adoràe, Pr chaufàe sés drapeas, Pr bufàe sun feù, pr tiràe De l’aeve en sés sellas. (Pérot) Oui, mé vela men enbaras : Que dire quant jhe s(e)run la-bas Pr netre cunplliment ? Ça ! Grigot, que diras tu, tàe, Quant tu voeras l’enfant ? (Grigot) I li dirae : « Mun bun Ségnour , Ayéz, s’o pllét, pidai de nous. A ! qu’i s(e)riun ravis De voer le màetre de trtouts Den in pu bea lojhi ! » (Colin) I cré,màe, qu’i ferun fort bae, Si le voesun, de le priàe De béni nos troupeas, Nos beùs, nos vaches,nos vachalls, Nos moutuns, nos égnas.